Pema Khandu-a'n Naharlagun Vistadome Express vai liam

Arunachal Pradesh chief minister Pema Khandu chuan Pathianni khan Naharlagun rel station aṭangin Naharlagun-Tinsukia inkara tlan tur, Vistadome Express a vai liam.

He hun hi union home minister of state (MoS) Railways Darshana Jardosh leh Assam chief minister Himanta Biswa Sarma-te chuan virtual-in Guwahati aṭangin an lo hmanpui a ni. MoS Jardosh hian Guwahati aṭangin Naharlagun-Guwahati Shatabdi Express a vai liam ve nghal bawk.

Naharlagun-Tinsukia Vistadome Express hi Naharlagun aṭangin kar khatah ni nga a tlan dawn a, Thawhlehni leh Zirtawpniah a tlan lo ang. Tinsukia aṭangin Thawhṭanni leh Ningani-ah a tlan lo bawk ang. Vawiin aṭangin an service ṭan dawn a ni.

Shatabdi Express pawh hi a service ṭan nghal bawk a, he rel-ah hian AC chair coach pali, Vistadome coach pakhat leh luggage van pahnih a awm. Naharlagun aṭangin Thawhṭanni, Thawhlehni leh Zirtawpni-ah a chhuak ang a, Guwahati aṭangin Thawhṭanni, Ningani leh Pathianni-ah Nagarlagun panin a chhuak ṭhin bawk ang.

Chief Minister Khandu chuan Arunachal Pradesh tana Vistadome service tir a nih chu lawmawm a tih thu sawiin, sorkar laipui leh railway ministry chungah lawmthu a sawi. Hmarchhak bial chu ramchhung leh ram pawn aṭanga khualzinten an tlawh nasatna hmun a ni chho mek tih sawiin, Vistadome Expess service tir hian khualzin tam zawk an luh phah thei dawn a, hei hian an state sum lakluh pawh a tihpun phah thei dawn tih a sawi.