Nagaland Assembly-in AFSPA hlip tura phutna resolution pass

Nagaland Legislative Assembly special session, Thawhṭannia neihah chuan sipai hnena thuneihna sang pekna, Armed Forces (Special Powers) Act (AFSPA),1958 hman mek chu hmarchhak bial aṭanga hlip tura phutna resolution an pass.

Special Assembly-ah hian Nagaland-a he dan hman mek chungchang hi sawiho a ni a, sorkar laipui hnena he dan hlip tura nawrna tur resolution an siam chu MLA zawng zawngin lungrual takin a pass a ni. Nagaland-a remna leh muanna a awmna tura hma lak mekna chak zawka kalpui a nih theihna turin he dan hlih hi a ṭul tih an sawi.

Assembly chuan December 4 leh 5-a Mon district-a security force-ten civil mi 14 an kahhlum chu an dem thu an sawi bawk.

MLA-te chuan civil mite beih leh kahhlum an nih chungchangah thuneitute chu thupha chawi turin an phut a, he pawikhawihna thlenga mawhphurtute chungah ram dan angin hremna pek ngei an phut thu an sawi bawk a ni.

Mon district mipui te, pawl hrang hrang leh state mipuite chu sorkarin he thil thleng chungchanga hma a laknaah thawhpui tur leh, state chhunga boruak ṭha a awm theihna tura theihtawp chhuah turin an sawm bawk.

Civil mite thihnaa mawh­phurtute hremna pe ngei tur leh, Nagaland leh hmarchhak bial aṭanga AFSPA hlih phuta mipui leh pawl hrang hrangte hmalakna chu lawmawm an tih thu sawiin, Nagaland Assembly chuan an thil phut an nawrna kawngah democracy dan zawm leh, tharum thawhna thlen lo zawnga kalpui turin an ngen.

Resolution an pass-ah hian Naga mipuite chuan remna leh muanna a awm a, Naga buaina chu a rang thei anga chinfel turin an ngen reng a, mipuite aw ngaihthlak a, zahsak chu thil pawimawh a nih thu pawh an tarlang tel a ni.

Oting-a inkahna thlen dan Army-in chhui ṭan
Indian Army chuan December 4-a Oting khuaa civil mite kahhlum an nih dan chu a chhui ṭan. Army chuan tualchhung mite hnenah he inbeihna thleng chungchanga an thil hriatte, thlalak leh video origin nei chu Phone, SMS leh WhatsApp hmanga thawn turin an ngen a, thawn theihna number pawh an tarlang a ni. Chanchin hrilhtu nihna chu thupsak an ni dawn tih an sawi bawk.