Chakma/Hajong census titawp turin sorkarin thuchhuah siam lo : AP CM

Arunachal Pradesh chief minister Pema Khandu chuan an state-a Chakma leh Hajong raltlante chhiarpui neih tumna titawp turin sorkarin thuchhuah engmah a siam lo tih a sawi.

Pemaa Khandu chuan an state-a raltlan awm mekte chungchang chu chinfel ngei a tum a, Chakma leh Hajong raltlante pawh state dangah dah a tum a ni, a ti.

"Chhiarpui titawp tur hian state sorkar chuan thuchhuah engmah a siam lo. District thuneitute hnenah pawh chhiarpui neih chhunzawm leh thuai turin hriattir an ni ang," tiin Khandu chuan a sawi.

Kar liam ta Inrinni khan All Arunachal Pradesh Students' Union (AAPSU) chuan state sorkar hnenah Chakma/Hajong raltlan chhiarpui neih chu ni 15 chhung ngeia chhunzawm turin a lo ti a ni. AAPSU chuan December 7-a Prime Minister Office aṭanga lehkha an dawn hnuah state sorkar chuan chhiarpui neih hi a titawp niin an sawi. Zirlai pawl thuchhuah hi chhangin, CM Khandu chuan chhiarpui titawp tura thupek siam a nih loh thu a sawi a ni.

Khandu chuan state leilung fate hnenah Chakma leh Hajong raltlante chu state dangah sawnchhuah ngei an ni dawn tih a tiam tih sawiin, hemi rual hian dan ang taka an state-a awm leh dan kalha lutte hriat chian a ngai a, hemi hnu hian sorkar laipui hnenah state danga sawnchhuah an nih dan tur hi sawpui a ni ang, a ti.

Raltlante vanga an state-in harsatna an neihte chu tumahin chinfel pui an tum ngai lo tih Khandu chuan a sawi. "Prime minister Narendra Modi, home minister Amit Shah leh BJP sorkar chuan kan buaina hi chinfel a tum mek a ni. Arunachal hi tribal state a ni a, non-Aruanchalee mite inbenbelna tur a ni lo," tiin a sawi.

Chakma leh Hajong chu an state-ah raltlan anga lut an ni a, mahse an pung chak chho hle tih CM chuan a sawi bawk. Kum 2015-16 a sorkarin special survey a buatsaihah khan Arunachal Pradesh-a Chakma leh Hajong hnam awm zat hi 65,857 an ni a, mahse tunah chuan nuai hnih chuang an tling tawh nia chhut an ni.