Thla ruk dang Nagaland state pum 'disturbed area' ah puang
Sorkar laipui chuan Nagaland state pum chu thla ruk dang atan 'disturbed area' ah a puang chhunzawm. Union home ministry chuan Thawhlehni khan thuchhuah siamin, Nagaland state pum chu rambuai a la ni a, hei vang hian civil power puihna turin armed force hman chhunzawm a la ngai a ni, a ti. June 30, 2020 aṭangin thla ruk dang, December thla tawp thleng chu 'disturbed area' ah puan chhunzawm a ni thu a tarlang.
Nagaland hi kum 60 dawn chu Armed Forces (Special Powers) Act (AFSPA) hnuaiah a awm tawh a; kum 2015, August 3-a National Socialist Council of Nagaland (Isak Muivah) General Secretary Thuingaleng Muivah leh sorkar laipui aiawh RN Ravi-ten prime minister Narendra Modi hriatpuinaa inremna tur ruangam an ziah hnuah pawh he dan hman hi sut a la ni lo. Civil society group tam tak chuan AFSPA hi na taka sawiselin, dan sakei ti ten an sawi hial. He dan hnuaiah hian sipaite chu thuneihna sang tak pek niin, mipuite himna leh dan leh thupek kalh zawnga che nia hriatte chu dap, man leh kah theihna an nei an ni.