Assam NRC final Draft list tlangzarh ta ; Mi nuai 40 chuang list-ah tel lo!

Assam sorkar in hun eng emaw chen aṭanga a kalpui tawh, National Register of Citizenship (NRC) draft list a buaipui mek chu, nimin khan a list pahnihna a tihchhuak ta. Nikum December 31 khan draft list hmasa zawk hi a tichhuak tawh a ni.

Nimina NRC draft list tihchhuahah hian mi nuai 40 chuang hming a tel lo a, heng hming tel lo te hian khua leh tui an nihna hi an proof thei lo a nih chuan hnawhchhuah an tawk dawn a ni.

Hming tel lo te hian August 7 aṭanga September 28 chhung hian NRC Sewa Kendras (NSK)-ah form bik thehlutin an hming a tel loh chhan insawifiahna an thehlut thei dawn a, an insawifiahna hi pawmsak an nih loh chuan hanwhchhuah an tawk dawn a ni.

NRC hi mi vaibelchhe 3.29 in an apply a, heng zingah hian mi 2, 89,677 chu list-ah hian an tel a ni. Hetihlai hian registrar general Sailesh chuan draft list chiah a la nih thu sawiin, list-a tel lo te pawhin an insawifiahna leh khua leh tui an ni ngei a ni tih finfiahna an la nei thei a ni, a ti.

Chief Minister Sarbananda Sonowal chuan India khua leh tui diktak te chuan an dikna chanvo an neih ngei a duh thu a sawi a, NRC draft tlangzarh a nih hnuah pawh tumah chiai lo tura a duh thu a lo sawi tawh a, thuchhuah dik lo siam lo turin mipuite chu a ngen bawk a ni.

NRC-ah hian March 25, 1971 hma lama hmar­chhaka awm tawh te chu telh tur an ni a, dan loa ram chhunga lo lut te hriat­chhuahna tur atana tih a ni.

NRC draft list tar­chhuah hmasa zawkah khan mi vaibelchhe 1.9 telh an lo ni tawh bawk a ni. NRC hi Supreme Court enpuina hnuaiah kalpui a ni a, thla hmasa khan draft list hi tlangzarh tawh tura tih ni mah se tuilian vanga Assam in harsatna an tawh avangin tikhawtlai a lo ni tawh a ni.