Imphal-ah VDF leh police innawr buai

Manipur state khawpui Imphal-a Kwakeithel-ah Inrinni khan police-te leh Village Defense Force (VDF)-te chu nasa takin an innawr buai a, hliam erawh an awm lo nia report a ni.

VDF-te hian July 11 aṭang khan state sorkar hi an thilphut tihhlawhtlinsak turin an nawr tawh a, an thil phutah hian point 13 ziakthla in, sorkar hnen­ah hian an thehlut tawh a ni.

Thla 13 hlawh lak, an thla tin hlawh pun leh service security-te chu an thil phut zingah hian a tel.

Inrinni khan VDF te hian Tidim road-ah an thil ngiat, state sorkar in rei tak a tih­hlawhtlin loh chu nawrna turin ngawi rengin nawrh an huaihawt a, kawng an zawh a ni. An kawng zawh hi police-te chuan lo dangin an hnawhdarh theih lawk loh avangin an innawr buai zui ta a ni.

Police te hian tear gas leh mock bomb hmangin mipui pungkhawm hi hnawhdarh an tum a, an hnawhdarh theih loh avang hian tiang nen hnawhdarh an tum leh a ni. An innawr buainaah hian VDF mi ṭhenkhat hian police-te service revolver te an laksak nghe nghe a, police lam hian vawi eng emawzat warning an pek hnu pawhin an pe kir duh lo niin an tarlang.

Hemi anih avang hian police lam hian force chah belhin Kwakeithel Bazar bulah VDF nawrh huaihawt te hi an hualbet a, police official-ten inbiakremna an neihpui thei hram a ni.

Inbiak remna an neih hnuah hian VDF lam hian revolver leh magazine an laksak hi an pe let leh a, an thil phut chungchang hi DGP-te nen an sawi ho dawn a ni.

VDF hian Chief Minister hnenah an thil phut hi an thehluh tawh thu sawiin sorkar lam aṭang hian thu lawmawm lam hriat tur an la neih loh thu an sawi a, hemi avang hian nawrh hi an huaihawt tih an sawi.

Tunah hian VDF-te hi thla tin cheng 6000 hlawh pek an ni a, sorkar chuan hei hi cheng 7720-ah san sakin cheng 1000 ration allowance an tiam bawk a, mahse hei hi VDF lam hian an pawm duh lo a ni.