Nagaland : NPCC-in Assembly resolution siam sawisel

Nagaland Assembly-in Mon district-a security force-ten civil mi 14 an kahhlum chungchanga resolution an siamah sipaite ngaihdam dil tura an ngenna chu Nagaland Pradesh Congress Committee (NPCC) chuan sawiselin, Naga mipuite chuan sipaite chu ngaihdam dil ringawt turin an duh lo a, pawikhawihna thlentute hrem a, rorelna dik tak kenkawh an duh a ni, an ti.

NPCC president K Therie chuan thuchhuah siamin, Thawhṭannia special Assembly session neihah resolution siam dan chu an duh tawk lo tih sawiin, ngaihdam dil tura phut ringawt chu rorelna dik phuttu sipaite kut tuara thi chhungte bakah an khua leh hnam pum tan inhmuhsitna a ni, tiin a sawi.

Nagaland Assembly chuan Naga mipui huaisente zak takin a siam a ni tiin, Therie chuan ngaihdam dil ringawt chu an pawm thei dawn lo a, inthahna thleng chu thupha chawi vang ringawtin ngaihdam a ni tur a ni lo, a ti.

Mon district-a civil mite beihna thleng chungchangah chief minister leh home minister-te chuan an mawhphurna a tlanchhiatsan thei lo tih sawiin, "Beihpui thlaktu 21 Para military force-te kal tur chu an hriatpui em tih chungchanga mipuite zawhna an chhang tur a ni," tiin Therie chuan a sawi. Mipuite chuan pawikhawihtute hrem ngei an duh a, ASPA chuan a hum tur a ni lo a, dan ang takin an chungthu relsak an phut tih a sawi bawk. Sipaite chu state dang aṭangin Nagaland-ah kalin, pawisawi lo civil mite kahhlum theih ngawtna dan an nei lo tih a sawi.

NPCC hian President Ram Nath Kovind hnenah an thil phut pathum an lo thehlut tawh bawk. An thil phut zingah hian Oting-a inkahna thleng chungchang chhui turin all-party parliamentary committee din phutna pawh a tel.