Assam-Nagaland border-a chengte chhuah tir

Assam-Nagaland ramri hrula awmte chhuahtir hna chu Karbi Anglong district leh autonomous council thuneitute chuan Thawhṭanni aṭang an kalpui ṭan.

Karbi Anglong Autonomous Council (KAAC) chuan sorkar ram china awm chhungkaw 107-te chu an chenna hmun aṭang hian an chhuahtir a, buaina engmah awm loin kalpui a nih thu district SP Pushpdhar Singh chuan a sawi.

KAAC chuan Bokajan sub-division-a Lahorijan block-a sorkar rama cheng, mi 3,000 te chu chhuak tur hian an lo hrilh tawh a, an zinga 2,000 vel chuan an chenna hmun chhuahsan hi an remti tawh a ni.

Sorkar rama chengte chhuahtir tur chungchangah boruak ṭha lo a thlen lohna turin district thuneite chuan CrPC section 144 a lo puang tawh a, he bial huamchhunga dawr leh sumdawnna hmun dangte pawh inkhar vek tura tih an ni bawk. Ramri hrula cheng chhuahtirte hi a tam zawk chu Muslim niin Nepali an awm bawk a, Nagaland aṭanga lut ṭhenkhat an awm bawk.