Manipur-ah enkawl dam pung zel

Manipur-ah hri kai enkawl dam chu an pung zel a, recovery rate hi 44.81% a ni tawh. 

Thawhlehni khan hri kai enkawl zinga 59 chu an dam tawh avangin damdawiin hrang hrang aṭangin chhuah tir an ni a, anni nen hian hri kai dam tawh hi mi 553 an awm tawh a ni. Thawhlehni vek khan hri kai hmuh chhuah thar mi pasarih an awm a, state dang aṭanga haw vek an ni. Covid Care facility-ah dah nghal an ni a, contact tracing pawh neih nghal a ni bawk. Hri kai hmuh tawh hi mi  1,234 an awm a, an zinga  681 chu enkawl mek an ni. 

Delhi-a National Law School (NLS) ruahmannain Mumbai-a Manipur mi tangkhang, rel-a chuang thei lo mi 185-te chu special flight hmangin a thlawnin hruai haw an ni. Mumbai-a tangkhang dang, mi 1,500 vel chu special Shramik train hmangin an haw mek bawk.