Assam-Meghalaya ramri buaina January 15-ah chinfel theih an tum

Assam chief minister Himanta Biswa Sarma leh Meghalaya chief minister Conrad K Sangma te chuan Nilaini khan Guwahati-ah meeting neiin, state pahnihten ramri buaina an neih mek hmun 12 zinga hmun paruk chu nakkum January 15-a chinfel an rel.

Meghalaya deputy chief minister Prestone Tynsong chuan Chief Minister pahnihte hian meeting hlawkthlak tak leh tha tak an nei tih a sawi.

"Meeting ah hian state pahnihin regional committee an dinte chu an state chief minister ve ve hnenah December 31 a report thehluh hman turin an ti a ni. Report thehluh hnuah CM pahnihte hian meeting nei lehin, nakkum January 15-ah area paruka buaina chu chinfel hman tum a ni," tiin Tynsong chuan a sawi.

State pahnihte hian a thawh khatnaah area paruka buaina hi chinfel a, a hnuah area dang parukte chu zirchian leh a, buaina chinfel dan ngaihtuah chhunzawm an tum a ni.

A thawh khatna atana ramri buaina chinfel an tumna hi Tarabari, Gizang, Boklapara, Pilangkata, Ratacherra leh Hahim area a ni.

Chief Minister pahnihte chuan kum 50 dawn state pahnihten ramri chungchanga buaina an lo neih tawh chu chinfel ngei an duh a, an ngai pawimawh hle tih an sawi.