Gauhati HC-ah fake encounter chhui tura ngenna thehlut

Assam police-ten dawt hmanga inbeihna, fake encounter an neih ṭhin nia sawi chungchang chhui chiang turin Gauhati High Court-ah public interest litigation (PIL) thehluh a ni.

PIL thehluttu hi advocate Arif Jwadder a ni a, kumin May thlaa BJP sorkar thar a nih aṭang khan state chhungah fake encounter hi ṭum 80 a thleng tawh a, mi 28 in nunna chanin midang 48 in hliam an tawrh phah tawh a ni, a ti.

Kumin July thla khan Jwadder hian heng thil thleng vang hian National Human Rights Commission (NHRC)-ah complaint a lo thehlut tawh bawk. Commission hian September thla khan Assam Police-te chu report pe turin a hriattir a, November thla khan NHRC hian hemi chungchang hi Assam human rights commission ngaihtuah turin a hlan a ni.

Petition thehluhah Jwadder chuan fake encounter thlenga thi leh hliam tuarte hi misual leh pawikhawihtute an ni lo a, hetih lai hian police-te lam sawi dan chu a dang vek thung nia sawiin, hetianga dawt hmanga inbeihna thleng hi zan lamah vek thlengin, an mi beihte hi ralthuam nei lote an ni, a ti.