Meghalaya Speaker-in MLA 12 disqualify tura ngenna hnawl

Meghalaya Assembly speaker Metbah Lyngdoh chuan Congress party aṭanga Trinamool Congress (TMC)-a inlet, MLA 12-te disqualify tura ngenna chu nimin khan a hnawlsak.

TMC-a inpe MLA-te hi Speaker-in a pawm tak avangin Trinamool Congress hi Meghalaya-a eptu party lian ber an ni ta a ni.

Speaker Lyngdoh chuan Congress MLA te TMC-a an inchhunluh hi ram danpuiin a pawmpui a ni tih sawiin, Congress MLA Ampareen Lyngdoh-i'n heng MLA 12-te disqualify tura ngenna a thehluh chu hnawlsak a ni tih a sawi.

November 25 khan Congress hruaitu leh chief minister hlui, Mukul Sangma hoin Congress MLA dang 11-te chuan Trinamool Congress hi an zawm a ni. Mukul Sangma chuan Congres chu eptu party a nih anga hna thawk ṭha tawk loha a puh a, hei bakah Meghalaya Congress president atana Vincent Pala ruat a nih avangin a lungawi lo nia sawi a ni bawk. MLA 12-in an chhuahsan tak avangin Congress party hian seat 60 awmna, Assembly-ah han MLA panga chiah a nei ta a ni.

Meghalaya-ah hian TMC hi kum 2012 khan din a ni ve chauh a, tunah hian MLA 12 an nei ta a ni. Assembly inthlan lo awm turah pawh seat 35-ah chuh tal chuh an tum.