Assam-ah ruihhlo Rs vbc 500 hu tichhe tawh

Assam police-te chuan thla sarih chhungin ruihhlo chi hrang hrang an man, cheng vaibelchhe 500 hu an tichhe tawh.

Chief minister Himanta Biswa Sarma kaihhruai BJP sorkar chuan May thlaa thuneihna an chan aṭang khan ruihhlo do beihpui an thlak nghal a ni, ruihhlo pawh ṭhahnem tham tak an man tawh a ni.

Zirtawpni khan Karimganj district thuneitu leh police-te chuan Junitilla-a Police Reserve Ground-a 'Drug disposal programme' an buatsaihah ruihhlo an man, Rs vbc 43 man hu an halral a ni. Ruihhlo an halral leh tihchhiat hi heroin kg 3.16, Yaba tablet nuai 4.51, khuh damdawi bur nuai 1.1 leh ganja kg 2,100 te an ni. Barpeta district-ah pawh hemi ni vek hian ruihhlo cheng vaibelchhe khat hu tihchhiat a ni bawk.

Kumin July thla khan Assam sorkar chuan cheng vaibelchhe 163 hu ruihhlo chi hrang hrang a lo tichhe tawh bawk. Hemi ṭuma hian CM Sarma chuan an ruihhlo tihchhiat hi ruihhloa sumdawngten nikhata ruihhlo an tawlh ṭhin aṭanga 10% vel chauh a ni tih a sawi a, hetihlai hian ruihhlo tawlh zinga 90% chu Assam pawn lamah kalpuia ni tih a sawi. Assam chu ruihhlo laka fihlima siam tura theihtawp an chhuah tur thu sawiin, hei erawh chu thil harsa tak a ni dawn tih a sawi bawk.