Assam-ah Bajrang Dal-ten Kristian biak-in luhkhung

Assam-ah righ wing group, Bajrang Dal member-te chuan Silchar-a Kristian biak-ina Krismas lawmna inkhawm an neih lai chu luhkhungin, biak-in chu khar turin an phut.

Biak-in beitute hian Kristian-ten Krismas an lawm chu an haw lo a, mahse Hindu-te an tel ve erawh an remti lo tih an sawi.

Assam police officer chuan he thil thleng chungchanga complaint thehluh a awm lo a, hei vang hian thubuai ziah luh a ni lo tih a sawi. Cachar SP Ramandeep Kaur chuan thil thleng lian tham a ni lo tih sawiin, mahse he thil thlenga inhnamhnawihte laka erawh dan anga hma lak a nih tur thu a sawi a ni.

Biak-in beitu zinga pakhat chuan video thehdarhin, "Kristiante kan haw lo a, mahse Krismas chu Kristiante chauhin lawm rawh se. Krismas lawmnaa Hindu-te an tel hi kan duh lo a ni. December 25 hi Hindu-te tan Tulsa Diwas a ni tho a, mahse hei hi tumahin an lawm ve lo a, kan rilru a na a ni. He nia mi zawng zawngin Merry Christmas tia induhsakna an inhlan chuan, engtinge kan sakhua hi a din chan ve theih ang?" tiin a sawi.

Silchar-ah hian nikum khan Baijrang Dal hian Krismas lawmna hi an lo tibuai tawh bawk a, Hindu zinga Krismas lo lawm ve te chu vuak tur tiin an pawl hotu chuan a sawi a ni.