Nagaland-a AFSPA hman mek chungchang ngaihtuah turin sorkar laipuiin member 5 awmna Committee a din

Nagaland-a security force-ten civil mi 14 an kahhlum avanga sipai hnena thuneihna sang pekna, Armed Forces (Special Powers) Act (AFSPA) hlip tura sorkar nawrna kal zelah, union home ministry chuan AFSPA chungchang ngaihtuah tur hian member panga awmna Committee a din thar.

Committee hi registrar general of India Vivek Joshi-a'n a ho a, Nagaland aṭanga AFSPA hman a nih chungchangte zirchiangin, hlih a ṭul leh ṭul loh dante an zir dawn a, ni 45 chhungin report hi sorkarah an thehlut ang. An rawtna siam dan azirin AFSPA hman mek chungchangah hma lak zui a ni ang.

Nagaland chief miniter Neiphiu Rio, a deputy Y Patto leh Naga People's Front Legislature party leader TR Zeliang-te chuan thuchhuah inṭawm siamin, December 23-a union home minister Amit sha hoa meeting neihah committee din tur hia thutlukna siam a nih thu an tarlang. He meeting-ah hian Assam chief minister, North East Democratic Alliance (NEDA) convenor Himanta Biswa Sarma pawh a tel.

Kar liam ta khan Nagaland special assembly neihah an state bakah hmarchhak biala AFSPA hman mek chu hlip tura phutin, lungrual takin resolution an lo pass tawh a ni.