Hmarchhaka Omicron variant kai hmasa ber hmu chhuak

Khawvelin a buaipui mek, Covid-19 hri chi thar, Omicron variant kai chu hmarchhakah pawh hmuh chhuah a ni tawh.

Hmarchhak biala Omicron kai hmuh chhuah hmasa ber hi Manipur-a Imphal West district-a cheng, kum 48 mi, tun hnaia Tanzania aṭanga rawn haw a ni.

Manipur health department chuan hri kai hi Delhi aṭanga an state-a kir hnu, December 21 khan a sample lain Imphal-a Institute of Bioresources and Sustainable Development (IBSD)-ah genome sequencing tura thawn a ni a, Thawhṭanni khan Omicron a kai tih hmuhchhuah a ni tih a tarlang.

Omricon kai hmuh chhuah hi Imphal-a Jawaharlal Nehru Institute of Medical Sciences-ah enkawl mek a ni a, a ngaihtuahawm lo nia sawi a ni. A chhungte pathum pawh Covid positive tih hriatchhuah an ni tawh a, Omicron variant a nih leh nih loh erawh finfiah ala ni lo.

Manipur sorkar chuan mipuite chu hri laka invenna tura kaihhruaina siamte zawm ṭha turin a ngen nawn leh a, face mask pawh Covid variant hrang hrang laka invenna tura a pawimawh thu sawiin, ngai pawimawh thar leh turin a ti.