Nagaland : Army inquiry team-in inkahna thlenna hmun tlawh

Security force-ten December 4 leh 5-a civil mi 14 an kahhlumna, Nagaland-a Mon district-a mi chu nimin khan Indian Army enquiry team-in an tlawh.

Ministry of defence chuan Army enquiry team-in Oting, Nagaland an tlawh tur thu hi a hmain a lo sawi tawh a, Mon district-a Tizit police station pawh an tlawh tel nghal dawn tih a sawi.

December 4 khan 21 Para Special Forces (SF) chuan Oting khaw bulah civil mi motor-a chuangte chu beiin mi 13 an kaphlum a, he thil thleng vanga mipui thinrim-ten Army camp an beihnaa sipaite silai an hmehpuahah civil mi pakhat a thi leh a, sipai pakhat a thi tel bawk. Sipaite hian civil mite hi hel emaw an tih avanga kap niin an insawi a, mahse Naga mipuite chuan an insawithiamna hi an pawmsak lo a ni.

Nagaland police-te chuan 21 Para SF te lakah hian FIR pawh a ziaklut tawh a, civil mite an beih leh kahhlum chu an tum reng vang niin an puh. State sorkar pawhin he thil thleng chhui chiang tur hian special investigation team (SIT) a din tawh bawk.

SIT-in thil chhui hna chak zawka an kalpui theihna turin member pawh pariat aṭangin 22-ah tihpun an ni a, membmer ruat belh zingah hian Indian Police Service officer panga an tel. Tunkar hian civil mite lambunna tel, 21 Para special force sipaite statement pawh an lakkim theih beisei a ni.

Sipaite kut tuara civil mi 14 zetin nunna an chan hnuah, Nagaland-a sipai thuneihna sang pekna, Armed Forces (Special Powers) Act (AFSPA) hlip tura phutna a lian nghal hle. Pawl leh party hrang hrangten he dan hi hlip turin sorkar laipui phutin kawng hrang hrangin lungawi lohna an lantir a, Nagaland special Assembly pawhin AFSPA hlih phutna resolution hi lungrual takin an pass tawh bawk.