Nagaland-ah thla 6 dang AFSPA pawtsei

Nagaland-a pawl leh party hrang hrangten san state-a sipai hnena thuneihna sang pekna, Armed Forces (Special Powers) Act (AFSPA) hman mek chu hlip tura nawr a nih mek laiin, sorkar laipui chuan Ningani khan Nagaland state pum chu 'disturbed area' ah puan chhunzawmin thla ruk dang atan AFSPA a pawtsei.

Union home ministry chuan Nagaland-a AFSPA pawhseina tur thupek hi a tichhuak a, "Sorkar laipui chuan Nagaland state pum chu ram buai leh dinhmun hlauhawm taka la dingah a ngai a, hei vang hian civil thuneitute pui tura armed force-te an awm chhunzawm hi a la ṭulin a hria a ni," a ti.

Nagaland-a AFSPA hi hun rei tak hman a ni tawh a, pawhsei chhunzawm zel a ni. Kumin June 30 khan sorkar laipui chuan thla ruk atan a lo pawtsei tawh a, nimin aṭang khan thla ruk dang an pawtsei leh ta a ni.

Hetih lai hian December 4 leh 5-a security force-ten civil mi 14 an kahhlum avangin AFSPA hian sawisel a hlawh hle a, state chhunga pawl leh party hrang hrangte chuan he dan sawisel hlawh tak hi hlip turin sorkar laipui an nawr a, Nagaland Assembly pawhin AFSPA hlip tura an phutna resolution pawh an lo pass tawh bawk.

December 26 khan Nagaland chief minister Neiphiu Rio chuan AFSPA hlih chungchang ngaihtuah tur hian union home ministry chuan committee a din tih a sawi a, anni hian state chhung dinhmunte enfiahin thla thum chhungin sorkar laipuiah report an la thehlut leh dawn a ni.