Congress MP-in Assam CM lakah complaint thehlut

Congress MP Abdul Khaleque chuan Nilaini khan police-te hnenah Assam chief minister Himanta Biswa Sarma lakah complaint a thehlut.

Abdul Khaleque chuan CM Sarma hi Muslim-te huatna leh buaina chawk chhuak tura mipuite fuihah a puh.

December 10-a CM-in Morigaon district-ah thu a sawihah khan, Gorukhuti eviction kalpui chu kum 1983-a thil thleng chungchanga phuba lakna ni angin a sawi niin Khaleque chua a sawi. Sorkarin dan ang taka hma a lakna ni tur anga lang chu phuba lakna nia sawiin, chi leh chi inkara inhuatna thleng thei zawngin a sawi a ni, a ti. Kum 1983 February thla khan Assam Agitation neihnaah Darrang district-a Chalkhowa-ah Assam mi pariat thah an ni.

Gorukhuti-ah hian state sorkar chuan September thla khan dan loa sorkar ramah awmte chu chhuahtirin, agircultural project kalpuina atan a hmang dawn niin a sawi a ni. He hmuna awmte chhuahtir tuma an innawr buainaah hian mi pahnih an thi a ni.

Khaleque chuan eviction drive kalpuinaah inthahna thlengin, chenna inte pawh hal a ni hial tih a sawi a, "Hetianga an chet dan rawng tak phuba lakna nia Himanta Biswa Sarma-a'n a sawi hi inthahna thleng leh in halsakte hi a pawmpui tihna chauh a ni lo a, he hmalakna hi chi/sakhaw bilte beihna angin a tilang a ni," a ti.

Guwahati-a Dispur police station-a complaint a thehluhah, Khaleque chuan Indian Penal Code-a Section 153 leh 153-A hnuaiah CM Sarma hi thubuai siamsak a phut a ni.