China-in AP-a hmun hming a thlak chungchangah PM Modi a ngawih reng chhan Congress-in zawt

China sorkarin a ram chin nia a chhal, Arunachal Pradesh-a hmun 15 lai hming thlak chungchang chu external affairs ministry chuan a pawm lo thu sawi tawh mah se, he thil thleng chungchanga India prime minister Narendra Modi a ngawi reng chhan chu Congress party-in a zawt.

Congress president hlui, Rahul Gandhi chuan , "Ni rei vak lohah India-in 1971 war-a hnehna a chan kan lawm a ni. Ram tana hnehna leh himna chang tur chuan thutlukna fing leh chak tak neih a ngai. Ṭawngkam thiamna awmze nei lo ringawt vangin hnehna a chan theih loh," a ti.

Congress thupuangtu Randeep Singh Surjewala pawhin PM Modi kaihhruai sorkar chu sorkar nep tak, China-in a vaunaah aw chhuah ve ngam loa ngawi reng ṭhinah a puh.

Party thupuangtu dang, Gourav Vallabh pawhin China chetdan chungchangah PM Modi chuan huai takin an mitah en letin, hma a la ve nghal tur a ni, a ti. "Kan chhan ve ngamna hi Chinese apps ho khap ringawt hi a ni dawn em ni?" a ti. Sorkar laipui chuan China thiltih dan chu huai taka a do let a ngai a ni tiin, hemi kawngah hian Congress party chua a thlawp zel tur thu a sawi bawk a ni.