Kristian puithiam 'Jai Shri Ram' sawi turin vau

Manipur mi, Kristian puithiam pakhat chu Jammu and Kashmir-ah right-wing group mi leh sa nia hriatten vauin, 'Jai Shir Ram' tih sawi luih tir an tum a, a sawi duh loh avangin kut an thlak zui bawk.

He thil hi Krismas nia thleng kha nia sawi a ni a, mahse December 30 khan WhatsApp group leh Twitter lamah an vau lai short clip hi a darh chauh a, mipui an lungawi lo hle. Puithiam vautute hian an bial mite Kristian-ah inleh luihtirah an puh a, 'Jai Shri Ram' tih chham tura vauin a chham duh loh chhan an an zawt zui bawk. An vau lai thlirtu mipuite chu fuihin, pungkhawmte hian 'Jai Shri Ram' tih an lo aupui ni.

Right-wing group-ten an vau hi Chuhnglenlal Singsit, Manipur-a Kangkokpi district-a cheng a ni. The Wire-in a biaknaah he thil hi Krismas ni, chawhnu dar 3 vela thleng a nih thu a sawi. Kristian chhungkaw pakhatte inah kalin a ṭawngtai a, a haw lam a fate thilpek lei tura bazar a kal chu heng mite hian lo dangin, a kalna chhungkua chu Kristiana inleh luihtirah an puh zui ta niin a sawi. Rei vak lohah mi pawh pungkhawm belh zelin, mi 100 chuang an pungkhawm hman niin a sawi a, an zinga ṭhenkhat chuan vuakah te vauin, mi pathum vel chuan an beng zui niin a sawi.

Police-te an thlen hnuah thil awmdan a hrilh chung pawhin a thusawi an awih sak duh lo a, amah zawk chu manin lockup-ah darkar 24 chuang an hren bakah, nasa taka au khumin an vaw bawk tih Chunglenlal chuan a sawi. Kathua SSP chuan ni nga chhunga Manipur lam a pan lo a nih chuan a lakah action an la dawn tih a hrilh thu a sawi bawk.

Chunglenlal chuan Kathua-ah hian kum thum cheng tawhin, Kristian organisation 'Friends for Missionary Prayer Band' ah a thawk tih a sawi.