Nagaland : AFSPA pawhseina sut turin phut

Nagaland-a Nationalist Democratic Progressive Party (NDPP) chuan sorkar laipuiin Nagaland-a Armed Forces (Special Powers) Act (AFSPA) pawhseina thupek a tihchhuah chu sut turin an phut.

NDPP hi Nagaland-a eptu awm lohna ṭangrual sorkara tel zingah AFSPA pawhsei demna thu sawitu party pahnihna a ni. A hmain Naga People's Front (NPF) chuan he dan pawhsei a nih avanga an lungawi loh thu hi an lo sawichhuak tawh a ni. Nagaland ṭangrual sorkarah hian BJP pawh an tel a ni.

NDPP chuan home affairs ministry-in Nagaland-a AFSPA hman mek hlih a nih theih dan ngaihtuah tura a din, high-powered committee final report thehluh hun an ngaichang dawn nia Naga mipuite beiseina a lo neih laia, sorkar laipuiin a pawhseina thupek a tichhuak leh nghal mai chu mak an tiin, mipuite a tihnual hle a ni, a ti. Hei vang hian sorkar laipui chu a thutlukna lo siam tawh chu ngaihtuah ṭha leh a, sut leh turin a ngen.

Hei bakah ministry of home affairs (MHA)-in AFSPA pawhseina tur thupek a tihchhuahah, Nagaland chu 'hlauhawm leh ram buai' tia a sawi chungchangah NDPP chu an lawm lo hle a, MHA thusawi dan chu mipuite rilru hruai kawi tumna leh thil tihawm lo tak a nih thu an tarlang.

"Kum 20 chuang chu Nagaland hi state him ber zingah a tel a, security force-te nena inbeihna lian tham pawh a awm ngai lo. State chhunga boruak muanawmna tichhe thei tur thil thleng lian ber chu December 4-a Oting khuaa thil thleng kha a ni. Hei pawh hi hel pawl emaw, dan leh thupek bawhchhiat thil nena inzawmna nei lo tawp a ni. He thil thleng hian AFSPA hlih leh, 'disturbed area' tia sawi hlih a ṭulzia a tilang a ni," an ti.

Global Naga Forum-in PM hnenah lehkha thawn
Global Naga Forum chuan prime minister Narendra Modi hnenah lehkha thawnin, sorkar laipui chuan Nagaland-a AFSPA a pawhsei hmang chuan Nagaland mipuite dikna chanvo a palzut sak tih an sawi.

December 4 leh 5-a security force-ten Mon district-a civil mi, pawisawi lo mi 14 an kahhlumte chhungte chuan an hmangaihte hi an la sun mek a, hetih lai hian sorkar laipui chuan tualthahna thlengah mawhphurhna la duh loin, AFPSA hlih tumna chu a nei lo a ni, tiin an lehkhaah hian an tarlang.

Hmarchhak biala state sorkar hrang hrang, Nagaland, Meghalaya leh Manipur-te chuan AFSPA hlip turin sorkar laipui an ngen tawh a, hmarchhaka civil society hrang hrangte chuan hun rei tak aṭangin AFSPA hlih hi an lo ngen tawh bawk a ni, an ti.

Oting khuaa inthahna rapthlak tak thleng chuan Hornbill Festival leh Krismas hlim tak an hman tur a tichhiatsak a, hetih mek karah Prime Minister chuan Nagaland mipuite tana kumthar thilpek atan AFSPA chu a pawhsei sak leh a ni, tiin Global Naga Forum chuan PM Modi hnena lehkha an thawnah hian an tarlang a ni.