Assam-in PSO dah chungchangah policy thar siam

Assam sorkar chuan personal security officer (PSO) dah chungchangah policy thar a siam a, PSO dah zat hi tihtlem a ni dawn.

Chief minister Himanta Biswa Sarma chuan constitutional post - minister, chief secretary, High Court judge, deputy commissioner, additional chief secretary-te tih lohah chuan PSO hi security dinhmun azirin dah chauh a ni zel ang, a ti.

"Security hna thawk turin battalion li dah an ni a, hetih lai hian personal security atan mi 4,240 dah an ni thung. Assam sorkar chuan personal security pekna atan hian cheng vaibelchhe 400 vel zet a seng a, hetiang hian kan chhunzawm reng thei lo ang. Political leader-te venhim hna thawk turin PSO 2,526 dah an ni a, chief secretary, principal secretary, commissioner leh a dangte tan PSO 854, judicial officer-te tan PSO 546, sumdawng leh zirlai hruaitute tan 167, tea estate manager-te ta 40 leh hel pawl hruaitu hluite tan PSO 52 dah an ni bawk a ni," tiin Chief Minister chuan a sawi.

Mahse hengte hi thlak danglam vek a ni dawn tih sawiin, CM chuan security pek dan tur Z leh Y category angin siam a ni dawn tih a sawi a ni. Security dinhmunte an zirchian hnuah, Superintendent of Police (Sp) chuan ni 10 chhung atan chauh PSO ruat theihna hi a nei dawn a; DGP, ADGP (SB) chuan ni 30 chhung atan PSO a ruat thei bawk ang. Ni 30 aia tam ngai chinah chuan security review committee thurawn angin Chief Minister pawmpuina lak zel a ngai ang.