Assam NRC Draft: Meghalaya fimkhur, Tripura in NRC kalpui ve duh

Assam-in hun eng emaw chen a buaipui tawh National Register of Citizens (NRC) final draft list chu a tlangzarh hnu lawkah Meghalaya sorkar chuan fimkhur a ṭul thu a sawi nghal a, Tripura-a INPT party-te chuan NRC kalpui ve an duh thu an lo sawi ve bawk.

Assam NRC Draft list hi Thawhṭanni chawhma dar 10 khan Guwahati-a press conference neih paha tlangzarh a ni a, he hunah hian Registrar General leh Census Commissioner, Sailesh, Ministry of Home Affairs joint secrrtary Satyendra Garg leh Assam state NRC coordinator Prateek Hajela te an tel a ni.

Sailesh chuan NRC draft list-ah hian NRC diltu mi 40,07707 chu telh an nih loh thu a sawi a, mi 3,29,91,385 apply zingah mi 2,89,83,677 chu NRC draft list-ah hian an tel tih a sawi.

Sailesh chuan hei hi draft list chauh a la nih avangin, list-a tel lo te hian objection-te pawh an la file thei tih a sawi bawk.

NRC draft list hi tihchhuah 1951 hnua tihchhuah leh vawikhatna a ni a, nikum December thla khan draft list hmasa zawk chu tihchhuah a lo ni tawh a ni.

NRC list update a nih chhan hi state chhunga dan loa awm zawnchhuah an nih theih nan a ni a, March 24, 1971chu cut-off date atan hman a ni.

NRC draft list-a tel lo an tam avangin buaina chhuak thut thei laka invenna turin Assam hmun ṭhenkhatah chuan CrPc Section 144 puan a ni nghe nghe.

Meghalaya fimkhur
Assam NRC draft list tihchhuah a nih hnu lawkah hian Meghalaya sorkar chuan thuchhuah siam nghalin Assam NRC draft list-a mi nuai 40 chuang telh an nih loh avangin an state chhungah list-a tel lo te hi an luh huk theih avangin fimkhur a ṭul thu an sawi.

Meghalaya Deputy Chief Minister, Prestone Tynsong chuan dan loa Assam aṭanga Meghalaya-a lut an awm lohna turin fimkhur a ṭul thu a sawi a, list-a tel lo te chu an state chhunga an luhna chance a sang hle tih a sawi a ni.

Tynsong chuan district hrang hrang Deputy Commissioner-te chu fimkhur tura an chah thu a sawi a, khuaa mi chengte enfiahna tur kaldan pawh an hrilh dawn niin a sawi.

NRC kalpui an tum ve em tia media ten zawhna chu chhangin Tynsong chuan Assam sorkar hmalak dan chu entawn an tum hran loh thu a sawi a, dan loa state chhunga lut an awm loh nan erawh hma an la reng tih a sawi thung.

State chhunga luhna leh chhuahna hmun bik siam te pawh an tum thu sawiin, state chhungah rel luhtir a nih hunah pawh hetiang hmun bik hi siam an tum thu a sawi, Tynsong chuan Ri-Bhoi district chu hetiang luhna leh chhuahna point siamna tur hmun atana ruahman a nih thu a sawi bawk.

Deputy CM chuan dan loa state chhunga lut enfiahna tur kalphung chu Sikkim tihdan entawn an tum thu a sawi a ni.

Khasi Student’s Union (KSU) pawhin nimin khan rorellai National People’s Party kaihhruai sorkar chu Assam in NRC draft list a tihchhuah avanga state chhunga lut an awm lohna tura fimkhur turin an lo chah tawh bawk.