Gauhati HC-in fake encounter chungchangah Chhanna pe turin Assam sorkar a hrilh

Gauhati High Court chuan nikum May thla aṭanga state police-te fake encounter hrang hrang an kalpui nia sawia PIL thehluh chungchangah, Assam sokar chu a chhanna pe turin a ti. January 11-ah hemi chungchang hi court chuan a ngaihtuah leh ang.

Nikum December thla khan New Delhi-a advocate Arif Jwadder chuan Gauhati High Court-ah PIL hi thehlultin, Assam police-ten fake encounter an neih ṭhin ho chu chhui chian a phut a ni. PIL a thehluhah hian kum 2021, May thla hnu lamah assam police-ten fake encounter ṭum 80 zet kalpuiin, mi 28 in an thih phah bakah mi dang 48 in hliam an tawrh phah bawk tih a sawi. Heng thil thlengte hi Central Bureau of Investigation (CBI) leh, Special Investigation Team (SIT) emaw state dang police team emaw chhui tir a phut a ni.

Thawhṭanni khan Gauhati HC chuan PIL thehluh hi a ngaihtuah a, PIL thehluttu aiawha inlan, senior advocate leh additional solicitor general hlui Indira Jaising chuan fake encounter thleng ṭhin chungchang hi Assam Human Rights Commission pawhin a hria a, notice pawh a lo tichhuak tawh a ni, a ti.

Nikum July thla khan Jwadder hian National Human Right Commission (NHRC)-ah complaint hi a lo thehlut tawh bawk. Commission hian September thla khan Assam Police-te chu report pe turin a ti a, November thla khan Assam Human Rights Commission hnenah he case hi a hlan chhawng a, mahse tun thlengin ngaihtuah a la ni lo.