Meghalaya Governor thusawiin ngaihven hlawh

Meghalaya governor Satya Pal Malik-a'n farm law sawipuia prime minister Narendra Modi a kawm dan chungchang a sawina video chu internet lamah a darh a, PM Modi-a'n chaldelh taka a lo chhan dan a sawichhuah chuan sawi zui a hlawh hle.

Social media-a Meghalaya Governor thusawina video clip darhah hian Malik chuan farm law duh lohna lantira loneituten nawrh an huaihawt chungchang chu PM a sawipui thu a sawi. PM Modi leh union home minister Amit Shah chunga a lawm loh thute pawh a sawilang.

Malik chuan, "Loneitute chungchang sawipui tura PM ka hmuh khan minute nga chhung lekin kan inhnialbuai nghal a ni. PM hian mi a tham loin a chaldelh hle a, loneitu 500 te thih chungchang ka sawi chuan 'Ka tana thi an ni em ni?' tiin min lo chhal let a ni. Mahse ram lalber a nih avangin a nih thu ka hrilh a, kan inhnialzui ta a ni. A hnuah Amit Shah hmu turin min ti ta a ni," a ti.

Congress party chuan Governor Malik-a thusawi chungchang hi sawi zui nghalin, PM Modi inlulin dan a sawi chu India ram democracy dinhmun tana ngaihtuahawm tak a ni dawn tih an sawi.

All India Majlis-e-Ittehadul Muslimeen (AIMIM) chief Asaduddin Owaisi pawhin PM Modi chu sawiselin, Govenor Malik nena an inkawmna aṭangin thu dik tak hriat a duh loh zia te, fakna aw chauh hriat a duhzia te a langchiang hle a ni, a ti.

Modi kaihhruai sorkar laipuiin governor atana a ruat, Malik hian central-a BJP sorkar policy bakah BJP leh prime minister Narendra Modi te hi na takin a lo sawisel fo tawh ṭhin a ni.