AP sorkarin digital infrastructure lam ngai pawimawh dawn

Arunachal Pradesh sorkarin kumin chhunga a ngaih pawimawh zual tur zingah digital infrastructure thuam chak te, inkalpawhna ṭha zawk leh hmasawnna thlenna tura kawngpui siamte a tel tih chief minister Pema Khandu chuan a sawi.

Kumin chhungin project pawimawh pahnih - Kra Daadi distrit-a Tali road leh Changlang-a Miao-Vujaynagar road project chu zawhfel ngei an tum tih CM chuan a sawi bawk.

Khandu chuan, "Miao-Vijaynagar road hi state chhunga project upa ber zinga mi a ni a, Union Territory a nih lai aṭangin hna hi thawh ṭan a ni tawh a ni," a ti. Arunchal Pradesh hi kum 1987 khan state puitlingah hlankai a ni.

"Kum 10 lo awm leh tura state chuan tourism industry leh power sector lamah hmasawnna nasa tak a hmu dawn a ni. State chhunga mega hydropower project tam tak chu zawhfel an ni tawh dawn a ni," tiin 2000MW Lower Subansiri project chu fiscal 2022-23 chhungin zawh fel a ni tawh dawn a, kumin August thla aṭangin 500MW pek chhuah theihna unit chu hman ṭan a ni ang, tiin CM chuan a sawi.