Arunachal Pradesh medical college hmasa berin Academic session ṭan ta

Arunachal Pradesh Chief Minister Pema Khandu chuann Nilaini khan Tomo Riba Insti­tute of Health and Medical Sci­ences(TRIHMS) MBBS zirlai batch hmasa ber te hnenah letters of admission a hlan a, hemi ni hian academic session an ṭan nghal a ni.

Khandu chuan session ṭanni chu ni chhinchhiahtlak tak a nih thu a sawi a, Arunachal Pradesh healthcare leh medical education tan chuan ni chhinchhiahtlak bik a ni, a ti. Medical College puitlinna tura rim taka thawktu zawng zawng hnenah a thinlung taka a lawm thu leh a lawmpui thu a sawi.

Medical college leh damdawi-in neih chu mipuite tan malsawmna a nih thu a sawi a, chief minister hlui Dorjee Khandu, Jarbom Gamlin, Kalikho Pul leh Nabam Tuki-te chu medical college din a nih theihna atana hma an lak avangin lawmthu a hrilh bawk.

Khandu chuan faculty member-te hnenah medical college an zawm avangin lawmthu a hrilh bawk a, dean professor P. Jayakumar hnenah a bik takin lawmthu a sawi a ni.

Chief Minister chuan Medical Council of India president Jayshree Mehta laka a lawm thu sawi bawkin MCI chuan an ṭanpui leh an thlawp chhunzawm zel a beisei thu a sawi.

Pema Khandu chuan state quota seat 39 chu hnawhkhah nghal vek a nih thu a sawi a, central leh NRI quota seat 11 chu hnawhkhah tura an la ngaihchan mek thu a sawi. Khandu chuan kum hnih chhungin intake chu 50 aṭanga 100-a tihpun an tum thu a sawi a, khum awm zat pawh 300 aṭanga 500-a tihpun thuai an tum thu a sawi bawk.

Para-clinical leh clinical subject-ah post-graduate course kum nga chhungin hawn hman an tum tih a sawi a, departments of cardiology, paediatric surgery leh oncology-te kumthar lamah chuan hawn hman a ni dawn tih a sawi a ni.

He hunah hian Public health engineering department minister Wangki Lowang leh Tuki-te pawh an tel a ni.