AAPSU in phalna nei loa pemlutte ni 15 chhunga State chhuahsan turin hriattir

Arunachal Pradesh-a zirlai pawl lian ber All Arunachal Pradesh Students’ Union (AAPSU) chuan thuchhuah siamin Arunachal chhunga phalna lehkha nei loa pem lutte chu ni 15 chhunga an state chhuahsan turin an hriattir.

APPSU thuchhuahah chuan state chhunga Arunachal mi ni lo umchhuahna tur ‘Operation Clean Drive’ an kalpui dawn tih an tarlang a, state chhung luhnaa district thuneitute an duty pui dawn thu an sawi bawk.

AAPSU general secretary Tobom Dai chuan dan loa state chhunga lut, Assam NRC list-a tel lo te chuan Arunachal luh an tum ngei a rin thu a sawi a, hemi anih avang hian AAPSU meeting chuan committee an din thu sawiin state chhung hmun hrang hrangah ‘Operation Clean Drive’ chu AAPSU member Tatung Taga kaihhruaina hnuaiah kalpui a ni dawn tih a sawi. Committee chuan dan loa state chhunga awm hriatchhuahna kawngah district hrang hrang thuneitute an pui thei dawn tih a sawi bawk a ni.

Dai chuan mipuite chu an Inner Line Permit (ILP) leh document dang pawimawhte chu buaina an tawh lohna tura lo inring turin a ti bawk.

Beihpui an thlak tur chuan dan loa awm te chauh a nghawng dawn tih sawiin state chunga phalna neia awm te tan chuan hlauhthawnawm a awm loh thu a sawi a ni.