Nagaland-a tribal body-in Shamator district siam phut

Nagaland-a tribal pawl, Yimkhiung Tribal Council (YTC) chuan Shamator sub-division chu district puitlinga hlangkai turin sorkar an nawr thar.

YTC hian Thawhṭanni aṭang khan Shamator district siam phutna hi kalpui lehin, sub-division huam chhunga sorkar office leh sumdawna hmunte chu darkar thum chhugin an khar tir vek a ni.

Thuchhuah an siamah,YTC general secretary S Tsuyihba chuan boruak muanawm tak hnuaiah nawrh hi huaihawt a ni tih sawiin, sorkarin Shamator sub-division chu district puitlinga hlankai a lo tiam tawh a, a thutiam a tihhlawhtlin loh avanga lungawi lohna lantir an nih thu a sawi. Sorkar hian a thutiam hi a tihhlawhtlin hma chu nawr chhunzawm zel an tum tih an sawi bawk.

Kum 2021, December 18 khan Nagaland sorkar chuan district thar pathum - Tsemingyu, Niuland leh Chumukedima a lo siam thar tawh a ni. Shamator district siam pawh a thuphungin remtih ni mah se, state sorkar chuan district ramri chungchanga an buaina chinfel leh, he bial chhunga hnam pahnih - Yimkhiung leh Tikhir-te inkarah inremna a awm hunah pawm a ni chauh ang tiin a sawi a ni.