Meghalaya-ah Omicron kai 5 hmu chhuak

Meghalaya state-ah Thawhlehni khan Covid-19 Omicron variant kai panga hmuh chhuah an ni.

Director of Health Services (DHS) Dr Aman Warr chuan Thawhlehni zan khan Omicron kai hmuh chhuah an nih thu hi a sawi a, pahnih chu Ri-Bhoi district ami niin, East Khasi Hills district-ah pathum -Langkyriding-ah pakhat, Happy Valley-ah pakhat leh Laitumkhrah-ah pakhat hmuh an ni tih a sawi.

Omicron kai hmuh chhuah zinga pakhat chu US aṭanga rawn haw niin, pakhat chu New Delhi aṭanga rawn haw a ni bawk. Midangte erawh chu hmun danga zin chhuahna nei lo a ni. Health official-te chuan Omicron kaite hi ni 4-8 chhung home isolation-a awm vek tawh an ni tih sawiin, an contact-te pawh test vek an ni dawn tih an sawi. State chhunga Covid-19 positive-te sample chu genome sequencing tih tura thawn vek a ni dawn tih an sawi bawk.

India ram chhungah Covid hri kai an pun leh avangin Meghalaya chief minister Conrad Sangma chuan an state-ah khuahkhirhna khauh zawk kalpui a nih tur thu a sawi bawk. Covid vaccine dose kima la tawh, an state-a lut turte chuan RT-PCR test negative report an neih zel a ngai tawh dawn a ni.