Assam CM-in ramri buaina kuminah chinfel beisei

Assam chief minister Himanta Biswa Sarma chuan Thawhlehni khan Meghalaya leh Arunachal Pradesh nena state ramri chungchanga buaina an neihte chu kuminah chinfel theih a beisei thu a sawi.

Hemi rual hian Nagland leh Mizoram nena ramri buaina chingfel tur erawh chuan hun tam zawk an la mamawh dawn tih Dibrugarh district-a Duliajan khuaa press conference a neihah a sawi nghal bawk.

Chief Minister Sarma chuan Meghalaya nena buaina an neihna hmun 12 zinga hmun ruk tana regional committee dinte chuan hma an la mek a, heng committee enkawltu minister pathum pawhin an buaina hi chinfel thuai theih a nih tur thu an hrilh tih a sawi.

Meghalaya leh Assam ramri buaina chinfel dan ngaihtuahin state pahnih chief minister-te chu ṭum li an inbe tawh bawk. Hmun paruka buaina an neihte chu chinfel thuai theih an beisei a ni.

Sarma chuan Meghalaya nena an buaina chinfel a nih hnuah, Arunachal Pradesh nena ramri buaina an neih chu chingfel turin hma an la zui dawn tih a sawi.