AP: SUMAA in State chhunga Tibetan awm te enfiah duh

Arunachal Pradesh-a zirlai pawl, Students’ United Movement of All Arunachal(SUMAA) chuan Inrinni khan state chhunga 1959-a Dalai Lama-an Tibet aṭanga an state a rawn luh ruala Tibetan raltlan awm te enfiahna tur kalpui an duh thu an sawi.

Zirlai pawl te hian Assam in National Register of Citizens (NRC) a kalpui ang chu kalpui ve an duh thu an sawi bawk.

SUMAA Vice Presi­dent Taje Jeke chuan West Kameng district-a Bomdila bula Tanzigang area velah Tibetan raltlan mi eng emaw zat an awm thu a sawi a, heng mite hi raltlan an nih avangin Arunachal mipuite chuan an khawngaiha an lo pawm mai chauh a ni, a ti. Mahse heng raltlan te hian tunah chuan dan loin trade license, Scheduled Tribes leh permanent residence certificate te pawh an nei tawh tih a sawi a, Juky 13 khan hemi avang hian Bomdila-ah duh lohna an lo lantir tawh tih a sawi.

Jeke chuan deputy commi­ssioner hnenah pawh state chhunga Tibetan raltlan te awmdan kimchang puangchhuak tura an hrilh tawh thu a sawi a, mahse hei hi tun thlenga tihhlawhtlin a la ni lo tih sawiin, hemi anih avang hian tunah chuan NRC kalpui ve hial an duh tawh tih a sawi a ni.

Jeke chuan official record-ah chuan state chhungah Tibetan raltlan mi 3000-4000 vel an nih laiin a nihna tak takah chuan 10,000 vel an awm tawh thu a sawi bawk.

SUMAA Vice President chuan state leilung fate duhna ngaihthlak ai chuan BJP sorkar chuan Tibetan Rehabilitation Policy, 2014, sorkar laipuiin a draft chu kaltlangpui an la tum deuh deuh tih sawiin, he policy hnuaiah hian Tibetan raltlan te tan job reservation 20% lai a awm dawn niin a sawi.

State chuan state dang mi tan 20% reservation a siam sa reng thu sawiin hei hi puitlin a nih chuan leilung fate tan job reserva­tion 60% chiah a awm tawh dawn tih a sawi bawk a ni.

Sorkar chu he policy hi kaltlangpui lo tura an ngen thu sawiin Bengal Eastern Frontier Regulation Act, 1873 hnuaiah ram leilung fate chu humhim an nih thu a sawi bawk.

Hetihlai hian Union minister of state for home Kiren Rijiju chuan tunhnai khan Tawang tan chuan Tibetan Rehabilitation Policy chu thil pawimawh tak a nih thu a sawi ve thung a, raltlante chhinchhiahna tura thil ṭangkai tak a nih thu a sawi a ni.