Ramdang mi leh D-Voter-te zawng chhuak turin theihtawp kan chhuah: NRC Coordinator

National Register of Citizens(NRC) Co­ordiantor Prateek Hek chuan Inrinni khan ramdang mi leh doubtful (D) voters-te chuan an hming leh an address thlakin NRC draft list-ah an inziahluh hman nual thu a sawi. Hek chuan heng mite zawnchhuahna kawngah hian an theihtawp an chhuah thu a sawi.

Prateek Hek chuan heng ramdang mi te bakah D-voters-te hi NRC final list-ah telh an nih lohna turin an theihtawp an chhuak mek tih a sawi a, tun dinhmunah mi 200 dawn chu rinhlelh an neih tawh thu a sawi.

Hek chuan heng an mi rinhlelh te hi chhungkaw 39 vel ami an nih thu a sawi a, Morigaon district-a NRC draft list ami te an nih thu sawiin NRC final list-a tel tlak an ni em tih chhuichian mek a nih thu a sawi bawk.

Prateek Hek chuan NRC final list tihchhuah a nih hma chuan an hnathawh chu an zo dawn lo tih a sawi a, mahse list zawng zawng enfiah vek chu thil hautak tak leh harsa tak a nih thu a sawi.

NRC draft list hi July 30 khan tlangzarh a ni a, hetah hian diltu mi vaibelchhe 3.29 zingah vaibelchhe 2.89 chu list-ah hian an hming ziahluh a ni a, mi nuai 40 chuang chu telh an ni lo thung.

NRC list-a tel lo an tam avang hian Assam ṭhen­awm state-te chu an fimkhur hle a, an state chhungah dan loa a ruka luh tum an awm leh awm loh uluk takin an vil a ni.