Assam NRC: West Bengal CM lakah FIR panga thehlut

West Bengal Chief Minister Mamata Banerjee-i chu Assam National Register of Citizens (NRC) dodala a ṭawngchhuah fo avangin a lakah hian FIR panga Assam police-te chuan an ziaklut tawh.

Mamata Banerjee laka FIR thehluhte hi Assam police sta­tion hrang hrangah ziahluh a ni a, Geetanagar police station, Guwahati-a Pan Bazar police station, Morigaon district-a Jagiroad police station, North Lakhimpur police station leh Jorhat police station-ah te ziahluh a ni tawh a ni.

Heng FIR-ah te hian West Bengal CM chu pawikhawihna thlen thei thil a sawi tih an ziak tlangpui a, Assam a remna leh muanna awm chu a thusawi hian a tihchhe thei niin an ziak hlawm.

Banerjee-i hian July 31 khan Catholic Bishops, New Delhi-a neiha thu a sawinaah NRC chu politics rilrua dah chunga kalpui a nih thu a sawi a, BJP in mipui ṭhenhran a tumna a nih thu a sawi. Hemi avang hian ramchhungah civil war chhuakin leh thisen tam tak a luang dawn a ni, a ti.

He a thusawi hi mi tam tak chuan nasa takin an dodal a ni.

A thusawi avang hian political party hruaitu ṭhenkhatin an sawisel nghal a, a party mi leh sa pahnih pawhin Banerjee-i chu thil thlen dan tak tak hre loa puhin party an chhuahsan tawh bawk.

Assam NRC draft list hi July 30 chawhma dar 10 khan tlangzarh a ni a, NRC diltu mi vaibelchhe 3.29 awm zingah vaibelchhe 2.89 hming telh a nih laiin mi nuai 40 chuang chu an hming a tel lo a ni.