Assam HM-in Covid-19 testing lab 12-na hawng

Assam finance and health minister Himanta Biswa Sarma chuan nimin khan Gauhati Medical College and Hospital (GMCH)-a Covid-19 testing laboratory thar a hawng. Hei hi Assam-a testing laboratory 12-na a ni a, nimin aṭang vek khan hman ṭan nghal a ni.

 

Sarma chuan he lab hi GMCH-a Microbiology department-in an enkawl dawn tih sawiin, ni 10 hnuah MMC hospi­tal-ah laboratory dang siam a ni leh dawn bawk tih a sawi. Sarma chuan an state-a hri leng mekah,Guwahati bikah sample 30,770 test a ni tawh tih a sawi bawk. 

Minister chuan Guwahati-ah nitin  bungraw phur truck 7,000 vel a lut ṭhin tih a sawi a, hei vang hian khawpui chhungah hri darh tur venna atan theihtawp an chhuah reng tih a sawi.

Khawpuia cheng mi 50,000 te ni 15 chhunga test-na tur, Assam Targeted Surveillance Programme (ATSP)  chu nimin aṭang khan kalpui ṭan a ni tih sawiin, test result a zir hian lockdown kalpui chhunzawm a nih dawn leh dawn loh pawh an la rel dawn tih a sawi.  

Assam-ah hian hri kai hmuh thar mi 201 awmin, Covid-19 kai hmuh tawh hi mi 4,510 an awm tawh a, an zinga 2,411 chu enkawl dam an ni tawh. 

State sorkar data-a lan danin, Assam-a hri kai hmuh hmasak ber chu March 31 kha niin, Silchar Medical College Hospital-a awm pakhatin a kai tih hriat a ni. Ni 48 hnu, May 17 khan hri kai hi 100 an tling. Mahse tang­khang an haw khawm hnuah hri kai zat hi an pung chak hle. June 5-ah hri kai hi 2,243 an awm a, ni 11 hnu, nimin thlengin a letin an pung hman a ni.