Nagaland aṭanga AFSPA hlih phûtin Dimapur-Kohima inkarah kawng zawh dawn

Nagaland-a security force-ten December 4 leh 5-a civil mi 14 an kahhlum avanga lungawi lohna leh, Nagaland-a Armed Forces (Special Powers) Act (AFSPA) hlih phutin January 10 hian Dimapur-Kohima inkarah Naga mipuiten kawng zawh an tum.

Civil mite kahhlum an nih hnua Nagaland leh hmarchhak hmun danga AFSPA hlih phuta political party leh pawl hrang hrangten an nawr mek laiin, December 30 khan sorkar laipui chuan Nagaland-a thla ruk dang atan AFSPA hi a pawtsei a, hei hian state mipuite pawh a tilungawi lo hle.

January 10 hian AFSPA hlih phutin Dimapur aṭangin mipuiten kawng an zawh dawn a, Kohima-a Raj Bhavan thleng zawhin Nagaland governor Prof. Jagdish Mukhi hnenah sorkar laipuia pek tur memorandum an pe nghal dawn a ni.

An kawng zawh tur hi km 70-a thui niin, he kawngzawh hi 'March againt AFSPA : Walk from Dimapur to Kohima' tih a ni. January 10, zing dar 6-ah Dimapur-a Supermarket aṭanga kal ṭanin, zanah Phiphema-ah an chawl ang a, January 11-ah Kohima an thleng a, Raj Bhavan-ah an tawp ang.

Nagaland-ah hian hun rei tak AFSPA hi hman a ni tawh a, mipuiten he dan hi duh loin hlip turin sorkar laipui pawh an phut reng tawh a ni. December 4-a sipaiten civil mite an kahhlum hnuah, he dan hian sawisel a hlawh chho leh zual a, hlip nghal turin sorkar pawh an nawr na leh zual a ni. Nagaland special assembly pawhin an state aṭanga AFSPA hlih phutna resolution hi an lo pass tawh bawk.