Gauhati HC virtual mode-in kalpui

Assam-ah Covid-19 hri kai an pun chhoh leh vangin nimin aṭang khan Gauhati High Court pawh virtual mode-a kalpui a ni leh ṭan.

Thupek thar tihchhuah a nih leh hma chuan court-a case ngaihtuah tur pawh tihtlem a ni nghal bawk. Thil hmanhmawh thlak bikte chauh ngaihtuah a ni rih dawn tih a sawi.

High Court chhungah mask vuah vek tura tih an nih bakah, social distancing dan zawm tura tih an ni bawk. Lawyer, staff leh security pawh Covid-19 vaccine dose hnih la lo chu High Court compound chhungah luh phal a ni lo.

Assam-ah Omicron kai 2 hmu chhuak
Assam-ah Nilaini khan Omicron variant kai pahnih hmuh chhuah a ni a, pakhat chu Sonapur ami niin, Hojai district-ah pakhat a awm bawk tih health minister Keshab Mahanta chuan a sawi.

Omicron kai hmuh chhuah thar zinga pakhat hi Saudi Arabia aṭanga rawn haw niin, pakhat hi mipa naupang kum 13 mi, tunhnaia a chhungte nena Mumbai aṭang rawn haw a ni.

Sorkarin hri leng dinhmun ennawn
Assam sorkar chuan nimin khan an state-a hri leng dinhmun a ennawn a, mahse chief minister Himanta Biswa Sarma chuan hri kai pung zel mah se, lockdown puan mai erawh an tum rih lo tih a sawi.

Chief Minister chuan, India ram hmun dang leh Assam-ah pawh hri leng an pung leh nasa tih sawiin, health department lam thuneitute nen an state dinhmun thlirin, a ṭul angin ruahmanna an siam thar dawn tih meeting neih hmaa chanchinbu mite a kawmnaah a sawi a ni.

CM chuan hrileng thawh thumna an tawrh mekah hri kai pawh nasa taka pung chhoin, ni khata hri kai pawh 10,000 te an tling chho leh mai theih thu a sawi , mahse hemi rual hian hri vanga thi erawh an tlem zawk a rin thu a sawi.

Health minister Keshab Mahanta chuan Guwahati, Kamrup, Jorhat, Diburgarh, Cachar, Hojai leh Nagaon-ahte hri kai hi an pung chho chak leh hle tih a sawi a, state chhunga hospital hrang hrang leh model hospital-te pawh inbuatsaih ṭha tura hriattir vek an ni tih a sawi bawk.