Assam sorkar hnathawkte meet-parents leave pe

Assam sorkar hnathawk, official leh minister-te chu nimin leh vawiin atan an nu leh pa, an puzawn/pizawn te hnena hun hmang ho turin special leave pek an ni.

Nimin leh vawiin special leave pek an nih bakah, naktuk Inrinni leh Pathianni nen hnathawkte hian ni li chawlh an nei thei dawn a ni.

Mahse meet-parents leave late hian an nu leh pa, puzawn/pizawn te bulah chawlh hi an hmang ngei tih fiahna tur an thlalak hona an neih ngei a ngai a, chawlh hman zawhah heng thlalakte hi senior officer-te an entir a ngai ang.

Assam chief minister Himanta Biswa Sarma chuan state sorkar chuan sorkar hnathawkten an nu leh pa, puzawn/pizawn te bula hun an hman lai thlalak upload-na tur portal a siam dawn a, heng vang hian special leave late hian an thlalak chu an thehluh vek a ngai a ni, a ti. Nu leh pate bula hlim taka an chawlh hun chu hmang vek turin a duh thu a sawi bawk.

Police-te tan special leave lak hi a la harsa deuh a, mahse thla li chhungin an tan hun hawnsak an ni dawn thung a ni, a ti. "Kum thar atan chuan sorkar hnathawk, a hniam zawkte chu khawi hmunah emaw an nu leh pate an zinpui theihna turin ruahmanna pawh siam kan tum a ni," tiin Chief Minister chuan a sawi.