AP-ah DMO office-a thawk mi 35 chuang khung hrang

Arunachal Pradesh-a Lower Dibang valley district-a Roing district medical officer (DMO) office-a thawktu pakhat chu Covid-19 a kai avangin he office-a staff dang 35-te chu inah inkhung hrang tir nghal an ni. 

Deputy commissioner chuan DMO office staff te hming tarlangin, mahni ina inkhung hrang nghal vek turin a hriattir. Staff zinga Covid-19 kai hmuh hi June 12 khan a chhungte hruai turin Roing aṭangin Jorhat a pan a, Jorhat entry point-a a sample laksak a nih hnuin coronavirus hi a kai tih hriat a ni. A hmain zin chhuahna a nei lo a, hei vang hian khawi aṭangin nge hri hi kai tih hriat theih a la ni lo. 

AP-ah hian hri kai hmuh tawh hi mi 99 an awm a, an zinga pasarih chu enkawl dam an ni tawh a ni. Changlang district-ah hri kai hi tam berin, mi 60 an awm.