Manipur-ah hri kai 500 tling tawh

Manipur-ah Thawhlehni khan Covid-19 kai mi 10 hmuh belh leh an nih avangin an state-a hri kai hmuh tawh hi mi 500 an tling tawh a ni. 

Health department chuan hri kai hmuh tharte hi Covid Care Centre-ah dah nghal an ni tih sawiin, contact tracing pawh  neih nghal a ni tih a sawi. Covid-19 kai hmuh tawh mi 500 zinga mi 159 chu enkawl dam ni tawhin, recovery rate hi 31.8% a ni. 

Department thuchhuah chuan nimin thleng khan Covid-19 training team chuan medical officer 522, staff nurse 917, healthcare provider 349, nurser midwive 902, leh social health activist 1,573-te chu hri kaite enkawl dan chungchanga training an pe tawh tih an sawi. 

State sorkar chuan hri kai an pun zel avangin tunhnaia Meitram-a UNACCO school campus-a Covid Care Centre siama khum 100 awm chu 300-ah tihpun a tum.