Assam: Koch Rajbongshi community-ten ST category an ngiatnaah buaina chhuak

Assam-a Kokrajhar dis­trict-ah Thawhṭanni khan Koch Rajbongshi community-te chuan Scheduled Tribe (ST) category pek ve ngiatin nawrh an huaihawt a, mi eng emaw zat an pungkhawm.

Heng pungkhawm-te hi police-ten hnawhdarh an tum a, nasa takin an innekbuai phah a, mi 12 in hliam an tuar.

Police-te hian mipui pungkhawm hi an hnawhdarh lawk theih loh avangin Go­saigaon area-a Soutara-ah chuan van lam hawiin silai te pawh an hmetpuak hial a, helai hmuna nawrh huaihawt te hian rel kawng an dang a ni.

Innawrbuaina thlen hun hi chawhma dar 11.30 vel niin tarlan a ni a, police-te hian Koch Rajbongshi Sanmi-lani hruaitu mi 15 vel an man bawk.

Sanmilani hi Koch Raj­bongshi community hnuaia pawl pakhat an ni a, All Koch Rajbongshi Students’ Union (AKRSU)-te nen hian ṭangkawpin rel kawng hi Thawhṭanni zingkar aṭang khan Soutara-ah hian an dang.

Police-ten an man zingah hian Koch Rajbongshi San­milani President Ranjit Rai leh AKRSU General Secre­tary Bipul Rai-te pawh an tel.

Rai chuan Koch Rajbong­shis-ten ST status pek an dilna chu central sorkar bakah state BJP sorkar chuan a ngaihsak duh loh avangin rel kawng chu an dan a ngai ta tih a sawi a, BJP kaihhruai NDA sorkar chuan thlaruk chhungin ST status pek an tiam thu sawiin 2016 daih tawha an thutiam kha tun thlengin an la tihhlawhtlin loh thu a sawi.

Nawrh huaihawt ten rel kawng an dan avang hian rel service eng emaw zat chu an buai phah hle a ni.

Rajdhani Express leh Guwahati-Bangalore Ex­press-te chu kawng dangah an kaltir a ngaih phah thu Northeast Frontier Railway chief spokesman Pranav Jyoti Sharma chuan a sawi.

Passenger phur rel pahnih Alipurduar-Kamakhya-Ali­purduar leh New Jalpaiguri-Rangiya, Rangiya leh Ali­purduar division service-te chu tlan tir an nih loh phah bawk a ni.