Manipur University buaina: Mi pariat in hliam tuar

Manipur University buaina kal zelah Thawhṭanni khan Manipur University (MU) zirlaite chuan campus chhungah nawrh an huaihawt a, police-te chuan heng nawrh huaihawt te hi hnawh darh an tumnaah mi pariat in hliam an tuar.

Police-te hian pung­khawm te hnawhdarh nan hian tear gas an hmang a ni.

Pungkhawmte hian “Save Manipur Uni­versity”, “Make the VC in-charge functional” leh “Save Manipur students” ti tea aurual in campus pawn lama au chhunzawm an tum a, police-te chuan heng nuar te hi lo hnawhdarh an tum a ni.

Varsity community lam chuan police-te hi nasa takin an sawisel a, chhan awm loa zirlaite beiah an puh a, police-te erawh chuan zirlaite hnawh darh nan hian tear gas an hman mai thu an sawi thung.

Community thuchhuah siamah chuan police ten tear gas leh mock bomb an hmang chu an duh loh thu an sawi a, hliam tuar zingah hian zirtirtu mipa pakhat pawh a tel tih an tarlang bawk.

Thawhṭanni khan Imphal West, Imphal East, Thoubal, Churachandpur leh Ukhrul district-ah te chuan zirlaite leh midang eng emaw zatin kawng zawhin May 30 aṭanga khar tawh MU chu hawn leh an ngiat a ni.

Human resource de­velopment ministry chuan VC Pandey an puhna chungchang chhuichiang turin fact-finding commi­ttee a lo din tawh a, Pa­thian­ni khan Manipur Deputy chief minister, Yumnam Joykumar Singh chuan zirlaite leh nawrh huaihawt mek te chu HRD ministry thutlukna ngaichang turin a lo ngen tawh bawk a, ṭha taka thawhpui turin a ngen thu a sawi.

Joykumar chuan MU buaina chinfel chu an ngaihpawimawh ber zinga mi a nih thu sawiin, zirlai 25,000 chuang hmalam hun chu an kutah hian a inghah thu a sawi bawk.

Dy. CM chuan university commu­nity-te chu fact finding community-te ringhlel lo tura ngenin, facts leh figures hmangin thil an chhuichiang dawn tih a sawi bawk.