Hmarchhak bialah hri kai an pung chak

India ram chhung hmun hrang hrangah Covid-19 hri a darh leh mek a, hmarchhak bialah pawh hri kai thar an pung chak chho leh hle. Hmarchhak state pathum - Assam, Manipur leh Meghalaya-ah Omicron variant kai hmuh an ni tawh bawk.

Hri kai an pun leh avangin hmarchhak state hrang hrangte chuan hri leng laka invenna tura inkaihhruainate siam thar lehin, inkalpawhna lamah pawh khuah­khirhnate an siam leh a ni. Mask hmang ṭha tura mipuite chahin, mi tam tak punkhawm khap a nih bakah social distancing dante zawm ṭha turin mipuite an ngen thar leh.

Assam-ah chuan ni 10 liam ta chhungin hri kai thar hi a let nga zetin an pung chho hman, positivity rate pawh a let ruk dawnin a pung a, Ningani khan 2.37% a ni tawh. Hri kai hmuh chhuah thar 844 awmin, heng zinga 369 chu Guwahati khawpui leh a chheh vela hmuh a ni.

Hri kai an pun chak leh avangin an state dinhmun thlirin Ningani khan chief minister Himanta Biswa Sarma hoin review meeting neih a ni. CM chuan hri kai pung zel mah se lockdown puan tumna erawh a awm rih lo tih a sawi a, inkaihhruaina thar erawh a siam dawn. Curfew hun thlak danglam rin a ni a, punkhawm khapna khauh zawk pawh an siam rin a ni bawk. Kaihhruaina an hman mekah zan dar 11.30 aṭanga a tuk zing dar 6 thleng curfew hi puan a ni.

Manipur state pawhin hri kai an pun zel avangin hmun dang aṭanga an state lut turte tan kaihhruaina thar siamin, Manipur an luh hma darkar 48 chhunga Covid-19 RT PCR negative report an neih zel a ngai dawn a ni. Hri laka invenna tura kaihhruaina siamte pawh khauh taka kengkawhin, Ningani khan pawn chhuahnaa face mask vuah lo mi eng emaw zat manin pawisa chawitir an ni a, khawlaia chil chhakte pawh man an ni bawk.

Meghalaya-a Covid hri kai thar, positivity rate pawh Ningani khan 0.17% aṭangin 0.24% ah a kai chho. School thlasik chawlh, January 10 thleng neih tura tih pawh January 24 thleng pawhsei a ni bawk. Education minister Lahkmen Rymbui chuan hri kai an pun thar leh avangin, zirlaite himna atan school chawlh hun hi pawhsei a nih thu a sawi.

Nagaland-ah Ningani khan hrikai thar 31 awmin, kumina ni khata hri kai thar an tam ber ni a ni. Ni 11 chhung Covid vanga thi an awm tawh loh hnuah, Ningani khan hripui vang hian mi pakhat a thi a ni. Hri kai enkawl dam, recovery rate pawh Nilaini khan 94.29% niin Ningani-ah 94.21% ah a tla thla bawk.

Sikkim-ah pawh positivity rate hi 11.5% a kai chho tawh bawk a ni.