BJP mi leh saten an sawisak Tripura TMC hruaitu a thi

Tripura-a Trinamool Congress (TMC) hruaitu, Mujibur Islam Majumder chu thla li liam taa Tripura BJP mi leh sate an sawisak avanga hun rei tak enkawl a nih hnuin, Nilaini khan Kolkata damdawi-inah a thi.

TMC lamin an sawi danin, Majumder hi August 28-a Badharghat khuaa Trinamool Congress Chhatra Parishad-in foundation day programme an hmannaah BJP mi leh sa nia sawiin nasa takin an sawisa a ni. A hliam a nat avangin Kolkata-a SSKM Hospital panpui a ni a, he damdawi-inah hian a thi ta a ni.

Hetih lai hian BJP chuan Majumder chunga thil thlengah hian inhnamhnawihna an nei lo niin an sawi thung.

Tripura-a TMC convenor Subal Bhowmik chuan an state-a BJP rorelna hnuaia dan leh thupek a tluchhe tawh niin a sawi a, Majumder thah a ni chu a dem thu a sawi. Majumber hi thah a ni ngei nia sawiin TMC hruaitu leh activist-te chuan Raj Bhavan bulah lungawi lohna an lantir nghal a, an zinga 120 chu police-te'n an man.

Bhowmik chuan an party chuan Governor Satyadeo Arya hnenah memorandum thehluh an duh a, mahse an lo hnar tih a sawi.