Tripura-Manipur-a tlan tur Jan Shatabdi Express vai liam

Union railway minister Ashwini Vaishnaw chuan Inrinni khan Agartala, Tripura - Jiribam, Manipur inkara rel tlan tur, Jan Shatabdi Express a vai liam.

Jan Shatabdi Express hi Agartala-a Badharghat rel leh Manipur-a Jiribam rel station inkarah kar khatah vawi thum a tlan ṭhin dawn a, darkar ruk hun a hmang dawn a ni.

Union minister Vaishnaw hian video conferencing kaltlanga vai liamin, prime minister Narendra Modi kaihhruai sorkar chuan hmarchhak bial leh ram chhung hmun dangte inkalpawhna ṭha zawk siam turin hma a la zel tih a sawi.

Tripura chief minister Biplab Kumar Deb chuan he hun hi hmanpuin, Tripura leh Manipur chuan inzawmna ṭha tak an nei tih sawiin, Tripura lalnu pathumte chu Manipur ami an nih thu a sawi. Tunah state pahnihte chuan rel hmangin inzawmna ṭha tak an nei leh dawn a, hmarchhak state-te rel hmanga intlawhpawhna kawng siam hian he bial chunga mipuite tan pawh sum lakluhna tur kawng thar tam tak a siam dawn a ni, a ti.

Manipur chief minister N Biren Singh pawhin state pahnihte chuan lal neih hunlai aṭangin inzawmna nghet tak an lo nei tawh tih sawiin, rel kawng hian Manipur leh Tripura chauh pawh loin, hmarchhak bial pum a pawh dawn tih a sawi bawk.