Assam-in Covid-19 hri kai te Omicron variant angah ngai zel dawn

Assam sorkar chuan an state-a Covid-19 hri kai tawh phawt chu Omicron variant kai angin a ngai zel phawt dawn tih chief minister Himanta Biswa Sarma chuan a sawi.

Assam-ah hian Omicron variant kai hi pakua an awm tawh a, an zinga a tam zawk chu Dibrugarh-a mi an ni. Omicron kai zinga pakhat chu vaccine dose hnih la tawh a ni.

Chief Minister chuan, "Hri kai tharte hi eng variant ber nge tih hriat mai a nih loh avangin positive hmuh tharte chu Omicron variant kai angah kan ngai zel ang a, genome sequencing ti kher loin uluk taka enkawl an ni ang," tiin a sawi. December 27,2021 aṭangin an state-ah Covid-19 hri kai thar chu ni hnih danah a letin an pung zel tih a sawi bawk.

CM chuan January thla tawp lamah an state-ah hri kai chu a peak a thleng dawn nia ngaih a nih thu sawiin, hri leng thawh hnihnaa chawhruala ni khatah hri kai thar 6,536 awm ṭhin chu January thla tawp lamah chuan 15,000 velah a kai chhoh a rinawm thu a sawi.

In lama hri kai inenkawlte chu medicine kits pek zel an ni dawn a, ni sarih hnuah test tawh kher loin negative anga ngaih an ni ang,a ti. Hospital-te pawh hri kai an enkawlte chu symptom an nei lo a nih chuan ni nga hnuah test kher loa chhuah tir tura tih an ni a, in lamah ni sarih chhung an inkhung hrang leh dawn a ni,a ti.

Inrinni aṭang khan zan dar 10 aṭanga a tuk zing dar 6 thleng curfew puan a ni a, pawn chhuahnaah face mask hman vek tura tih niin, mask hmang lote chu pawisa chawitir zel an ni bawk ang. Vaccine la lote chu hotel, mall, restaurant, theatre, gym leh punkhawmna hmun dangah an kal khap a ni a, heng hmunah hian vaccine la lo kal an awm a nih chuan a neitute chu mawhphurtua puhin Rs 25,000 zel chawitir an ni ang.

State sorkar chuan vaccine pek chhuah hna pawh chak zawka kalpui zel a tum a, chawhruala ni khata dose 30,000 zel pek chhuah ṭhin chu tihpun a tum.

Sorkar hnathawk, vaccine la lote pawh chawl tura tih an ni a, an leave neihin a daih tawh loh a nih pawhin unpaid leave angin kaltir an ni dawn bawk a ni.

Class 5 leh a hnuai lam zirlaite chu January 30 thleng chawlhtir an ni. Guwahati bikah chuan Class 8 thleng an chawl ang. Class 9-11 zirlaite chu a inchhawkin, kar khatah ni thum school an kal ang.