AP: CMAAS Governing body meeting hmasa ber Itanagar-ah neih a ni

Arunachal Pradesh-a Chief Minister Arogya Arunachal Society (CMAAS) governing body meeting hmasa ber chu Ningani khan an state khawpui Itanagar-ah neih a ni.

Meeting hi chief minister Pema Khandu chuan a kaihruai a, he hunah hian health minis­ter Alo Libang, Health Commi­ssioner leh governing body member-te an tel.

CMAAS hi Arunachal Pradesh Chief Minister Uni­versal Health Insurance Socie­ty tih a ni ṭhin a, tunhnai lawk­ah khan a hming hi thlak a ni.

Arogya Arunachal Society-ah hian Chief Minister chu Chairman niin Society hian hriselna lam hawia hmalakna, Chief Minister Arogya Arunachal Yojna (CMAAY) chu an kalpui ang.

Juky 26 khan health insua­rance scheme, CMAAY hi tlangzarh a lo ni tawh a, August 15 aṭanga hmanṭan tura ruahman niin thlahnih chhung chuan kalpui dan tur ruahman anga kalpui hman tum a ni.

Pema Khandu chuan scheme kalpuina tur atana in­buatsaihna leh scheme dinhmun te a enfiah. Governing body kalkhawm te chu he scheme hnuaiah hian mi a tam thei ang ber an inziahluh theih nana hmala tura hrilhin, chhungkaw tinin hamṭhatna an dawn theihna tur ngaihtuah turin a ti a ni.

Chief Minister chuan dis­trict tinah kiosks buatsaih a mipui ten scheme chungchang chiang taka an hriat a pawi­mawh thu a sawi bawk.

CMAAY kaihruaina bua a inziah dan chuan APST zawng zawng, sorkar hnathawk leh resident certificate nei zawng zawng te chuan he schema-a hamṭhatna hi an dawng thei dawn a, document pawimawh APST certificate, Aadhar emaw residential certificate emaw hmangin hamṭhatna hi an dawng thei a ni.

Chief Minister chuan he scheme hi a nihna dan tur ang taka kalpui a nih hunah chuan Chief Minister relief fund chu tihtawp a ni dawn tih a sawi.