Nagaland : Ni khatah ILP fel lo mi 44 man

Nagaland-a zirlai pawl Naga Students Federation (NSF) chuan thuchhauh a lo siam tawh angin Nilaini aṭang khan a thawhkhatna atan Dimapur leh Kohima-ah dan loa state chhunga lut enfiahna an nei a, mi 44 an man.

Assam NRC draft list-a tel lo state ṭhenawma luh tum an tam rin avangin Assam state ṭhenawm te chuan ramriah venhimna khauh takin an kalpui hlawm a, dan loa lut an awm lohna turin uluk takin an ramri an vil hlawm a ni.

Hemi kawnga hmalakna atana hian NSF pawh hian a thawhkhatna atana beihpui an thlak hnu hian ILP nei lo mi 17 leh ILP thi tawh mi 18 an man thu a sawi a, Dimapur-ah pawh document pawimawh engmah nei lo mi pakua an man thu a sawi bawk.

Aadhar card lem kawl pawh an man tih sawiin NSF President chuan tualchhung mi ni lo taxi driver te leh insak hna thawktu labour tam tak chuan document pawimawh an nei lo tih a sawi bawk a ni.