Hmarchhak state-te'n kaihhruaina siam thar

Covid-19 hri darh thar leh mek avangin hmarchhak state-ten hri laka invenna tur khuahkhirhna khauh zawk an siam thar leh mek.

Assam-in inkaihhruaina thar a tichhuak tawh a, Nagaland, Sikkim leh Tripura-te pawhin an siam thar ve leh.

Nagaland
Nagaland sorkar chuan zan lam curfew a kalpui chhunzawm leh a, mipui punkhawmte khapin January 31 thleng Class 8 leh a hnuai lamte a khar bawk.

Chief secretary J Alam chuan Pathianni aṭang khan zan dar 9 aṭanga a tuk zing dar 5 thleng curfew puan a nih thu sawiin, punkhawmna hmunah a leng zat aṭanga 50% emaw, mi 200 aia tam lo punkhawm phal a ni, heng hmuna pungkhawmte pawh vaccine dose kima la tur vek an ni, a ti.

Mall, shopping complex, restaurant, gymnasium, cinema hall/theatre, park leh intihlimna hmun dangah pawh 50% capacity awm phal a ni a, mahse heng hmun tlawhtute leh thawktute pawh vaccine dose kima la vek an ni tur a

Pawn lam aṭanga an state tlawhtu, kum 12 chunglamte chuan ni thum ral hmaa RT-PCR negative report an neih a ngai bawk.

Sikkim
Sikkim sorkar pawhin Pathianni aṭang khan kaihhruaina thar hmangin, January 14 thlengin an state tlawhtute chuan RT-PCR negative report an neih vek a ngai.

Motor-te pawh odd-even number te intlan chhawk tir an ni a, mahse essential service bakah sipai leh security agency, official tour-a kal sorkar official-te erawh a huam tello.

Khawtlang thil, politics leh sakhaw thil bakah infiamna lam thila punkhawmna huaihawt te, picnic, mela leh tambola te khap a ni bawk.

Pathianni khan Sikkim tourism and civil aviation minister BS Panth chu Covid-19 hri a kai tih hmuh chhuah a ni a, Covid protocol ṭha taka zawmin in lamah a inenkawl tih a sawi.

Tripura
Tripura sorkar pawhin nimin aṭang zan lam curfew a puang a, zan dar 9 aṭanga a tuk zing dar 5 thleng curfew hi puan a ni.

State information and cultural minister Sushanta Chowdhury chuan health expert-ten hri leng thawh thumna thleng mek chu Tripura-ah January-February thla hian a peak a thleng dawn niin an sawi tih a tarlang a, mipuite chu hri laka invenna tur kaihhruaina siamte ṭha taka zawm turin a ngen.

Tripura-ah hian state pumah hri kai hmuh chhuah, positivity rate hi 5% a nih laiin, Agartala Municipal Corporation huam chhungah chuan 16.95% a ni thung.

In chhungah meeting leh punkhawmte phal ni mah se, a hmuna leng zat hmun thum aṭanga hmun khat chin chauh kalkhawm phal a ni. Open space-ah erawh vantlang inkhawmte buatsaih khap a ni a, movie hall, sport complex, stadium, entertainment park leh bar-te chu 50% capacity chin awm phal a ni.

Shopping complex, mall, beauty parlour leh barber shop-te chu zing dar 6 aṭanga zan dar 8.30 thleng hawn phalsak an ni bawk. Sakhaw hmun hrang hrang pawh Covid kaihhruaina dan ṭah taka zawm chunga hawn phal a ni.